天氣凍，大家都鍾意喺屋企打邊爐，但洗菜時要小心喇，最近有網民喺「香港火鍋關注組」上載照片，喺屋企洗西洋菜時，只係浸咗10分鐘，就已經出現大大小小二十幾隻水蛭，最後被逼放棄呢批菜，究竟西洋菜點解咁多水蛭？點樣洗先乾淨？
因為西洋菜喺水田、濕泥種植，呢啲亦係水蛭生活嘅地方，所以好容易依附西洋菜生存，而水蛭只會吸動物體液或是血液，並不會食西洋菜，所以如果唔小心用手掂到，一定要快快用水沖走。依家教大家洗西洋菜嘅有效方法。
1.戴上膠手套
2.切去西洋菜根部
3.準備一大盤水
4.放3-4茶匙鹽攪勻
5.將西洋菜浸鹽水1-2小時
6.水蛭會死浮面
7.再用清水將西洋菜沖洗淨就可以啦
因為水蛭皮膚上有細孔平時用嚟吸水，當身體充滿水份嘅水蛭浸喺鹽水中，因為滲透壓力影響，會令佢地身體水分流失至萎縮，最後就會甩出脫離西洋菜。