相信唔少家長依家都係Work From Home，大家都見識到寶貝們嘅「功力」啦，你哋有冇覺得煩燥、焦急？
其實我無！反而幾享受在家工作同對仔仔嘅搞笑經歷。Fans們都知啦，每日我要做好多直播，其中一日呢對馬騮仔又搞怪喺我節目中大叫，但觀眾聽得好興奮喎，仲叫佢哋一齊出鏡……..
我個仔好鍾意睇電視。
你可能心諗：有邊個仔唔鍾意睇電視吖？唔係喎，我個仔唔只鍾意睇電視，佢仲鍾意上電視添喎！咁又真係唔係個個人鍾意喇！
話說，今日喺機緣巧合之下，有機會俾我兩個仔喺我嘅訪問入面過一過鏡，佢哋當然唔會放過呢個機會啦！
我同兩兄弟講：「快啲玩件衫出嚟，播完廣告俾你地兩個出嚟打個招呼！」只見弟弟入到房唔洗15秒就著住件超人衫出返嚟。我心諗，應該係姐姐幫佢揀嘅。
阿哥呢？就遲遲未出。「快啲啦，就嚟開始喇！」催極都未見人！我心諗，唔係仲要打扮呀嘛？而其實，我心底裡係知道，哥哥係真心重視呢個機會嘅！
平時喺屋企，佢成日都模仿我講：「歡迎大家收睇XX財經資訊台⋯⋯」但最大嘅問題係：佢今日都有講！但係今日係「另一個台」！全香港都聽到佢甩轆，我直頭想搵窿捐！
笑料一則，講完喇，不如講吓佢平時睇電視學左啲咩嘢返嚟！有一日我同佢傾開偈，講緊啲武器，佢忽然爆出左一句：「愛，係最殘忍嘅武器。」
我個下巴當堂跌左落嚟！七歲，究竟條友想點呀？要唔要老積成咁？我問佢點解，佢仲同我講：「有個人同你講『我好愛你呀，好愛你呀』，然之後一腳踢你落火坑！」
我暈低喇！都唔知俾咩反應佢。今日同佢睇戇豆嘅卡通版啦，戇豆俾個阿婆呃／定唔知佢呃個阿婆，特登氹對方。老婆口痕問吓佢：「點呀？最後佢俾人呃左啲咩呀？」
阿哥答：「冇，咩都冇呃到，淨係呃咗啲感情同信任啫。」救命呀！老人精！